Virus, selenio e ríos rebeldes no Zendoira

A terapia fágica utiliza uns virus (bacteriófagos) que son depredadores naturais das bacterias, eliminándoas de forma específica, sen danar as bacterias beneficiosas do noso organismo. Esta estratexia preséntase como unha alternativa prometedora fronte a un problema sanitario emerxente a nivel mundial: o incremento das bacterias multirresistentes aos antibióticos (superbacterias). Pode ser unha terapia eficaz cando os antibióticos xa non funcionan e presenta distintas aplicacións (terapéutica, desinfección, conservación e métodos diagnósticos) que estamos a explorar desde o Campus Terra da USC.

En Galicia temos moitos tesouros… pero o selenio non é un deles. Por culpa dos nosos solos ácidos e graníticos, este micronutriente esencial lévase fatal co territorio: non entra nas plantas, non chega aos animais e tampouco a nós. Nesta charla exploraremos que implica vivir nunha terra pobre en selenio, como afecta ás vacas, ovellas, cabalos.... e ás persoas, e por que, paradoxalmente, as nosas mascotas que comen penso están moitas veces mellor suplementadas ca nós.

Os ríos non son infraestruturas nin canles obedientes, son sistemas vivos e dinámicos! Nesta charla falaremos de por que os ríos ignoran os nosos plans, mapas e formigon, e de como moitos problemas actuais (p.e., inundacións, procesos de erosión) non son "fallos" da natureza, senón dunha mala lectura da paisaxe fluvial. Aprender a ler un río axúdanos a anticipar riscos, planificar mellor o territorio e tomar decisións públicas máis xustas e eficaces.