Leite, algoritmos e mulleres no rural no Km 66

CALLEIRA é o acrónimo de CAdea Luguesa do LEite e Informacións Rurais Adxacentes. Este proxecto de investigación liderado desde a facultade de Humanidades da USC en Lugo ten como obxectivo levar á tona as memorias e os relatos das mulleres sobre os procesos de tratamento, conservación, comercialización e consumo do leite e os seus derivados en catro puntos da provincia de Lugo: Chantada, Guitiriz, Palas de Rei e O Páramo.

Esta charla explora como a intelixencia artificial (IA) non só amplifica os problemas tradicionais da desinformación, senón que tamén transforma a forma en que as sociedades constrúen a verdade, a confianza e a participación democrática. Abórdase como os algoritmos median o fluxo de información, como se xeran as burbullas de opinión e que papel xoga a alfabetización mediática na loita contra a chamada "sobrecarga de información".

Que papel xogan hoxe as mulleres do rural? Que imaxe constrúe a sociedade sobre elas? As mulleres son clave para entender o presente e o futuro destes territorios, mais a emigración feminina continúa debilitando demograficamente e socialmente o rural. Nesta charla abordaremos por que marchan, que factores fan que estes espazos non resulten atractivos e que consecuencias ten esta saída constante. Tamén reflexionaremos sobre os cambios necesarios para que o rural sexa un lugar onde poidan desenvolver proxectos de vida en igualdade.